2576.
आम्हा सकळा हे । तुझ्या नामाचेंचि बळ ॥१॥
करू अमृताचे पान । दुजे नेणो काही आन ॥धृपद॥
जयाचा जो भोग । सुख दुःख पीडी रोग ॥२॥
तुका म्हणे देवा । तुझे पायी माझा हेवा ॥३॥

अर्थ :
हे देवा, हे पांडुरंगा आमच्यासारख्या हरिभक्तांकडे फक्त आणि फक्त तुझ्या नामाचेच काय ते बळ आहे, अन्य आमच्याकडे विसंबण्यासारखे काहीही नाही, सतत तुझ्या अमृतरूपी नामाचे सेवन करणे एवढेच काय ते आम्ही जाणतो, अन्य आम्हास काहीही माहित नाही. ह्या व्यतिरिक्त ज्याचा ज्याचा जो काही भोग आहे ते तो सुख, दुःख पीडा आणि रोग रूपाने भोगतच असतो म्हणेजच शरीर हे प्रारब्धानुसार त्याचे त्याचे भोग भोगतच राहणार, त्याच्या वाट्याला येणारे सुख दुःख त्याला घेत राहावे लागणार. तुकाराम महाराज म्हणतात परंतु मला मात्र तुझ्या पायाची ओढ लागली आहे, माझ्या मनाने त्याचा ध्यास घेतला आहे, त्यापायी माझा हेवा वाढतच चालला आहे.