3798.
(गौळणींची अवस्था)
गोड लागे परी सांगतांचि नये । बैसे मिठी सये आवडीची ॥१॥
वेधले वो येणे श्रीरंगरंगे । मी हे माझी अंगे हारपली ॥धृपद॥
परतेचि ना दृष्टी बैसली ते ठायी । विसावोनि पायी ठेले मन ॥२॥
तुकयाच्या स्वामीसवे झाली भेटी । तेव्हा झाली तुटी मागिलाची ॥३॥

अर्थ :
एक गोपी आपल्या सखीला म्हणते हे सखे हरीच्या स्वरूपाची गोडी लागली तर त्या गोडी चे वर्णन सुद्धा करता येणार नाही इतकी गोड हरीच्या स्वरुपाची गोडी लागते. आणि चित्ताला त्याची म्हणजे हरीच्या स्वरूपाची मिठी अगदी घट्ट बसली आहे. या हरिच्या म्हणजे श्री रंगाच्या रंगाने मला इतके वेढून टाकले आहे की मी माझ्या देह बुद्धीला देखील हरपले आहे, देहाची देखील शुद्ध मला राहिली नाही. मी माझे मन व दृष्टी हरीच्या पायाच्या ठिकाणी ठेवले आहे आणि ते तेथेच विश्रांत पावले आहे त्यामुळे आता ते परत माघारी येत नाही. तुकाराम महाराज म्हणतात आता माझ्या स्वामीची माझ्याबरोबर भेट झाली आहे त्यामुळे मला मागीला संसाराची तूट झाली आहे.