2747.
सांडियेली काया । वरी ओंवाळूनी पाया ॥१॥
शरण शरण नारायणा । मज अंगीकारा दीना ॥धृपद॥
आलो लोटांगणी । रुळे तुमचे चरणी ॥२॥
तुका म्हणे शीर । ठेवियेले पायावर ॥३॥

अर्थ :
हे देवा मी माझे शरीर तुझ्या पायावरुन ओवाळून टाकले आहे. हे नारायणा मी तुम्हाला शरण आलो आहे तुम्हाला शरण आलो आहे माझ्यासारख्या दीनाचा तुम्ही अंगीकार करा. देवा मी लोटांगण घालीत तुमच्या चरणाजवळ आलो आहे आणि तुमच्या चरणाजवळच आता रुळलो आहे. तुकाराम महाराज म्हणतात, देवा मी माझे शीर तुमच्या पायावर ठेवले आहे.