850.
यम सांगे दूता कानी | तुम्ही जाता मेदिनी |विष्णुभक्त चुकवुनि | येर बांधोनि आणा ॥१॥
दूत सांगता यमा | दिंडीपुढे चाले नामा |ते नागविती आम्हा | विष्णुदूत म्हणोनी ॥२॥
जे नेणती धर्मवेळा | वाचे न उच्चारिती गोपाळा |तयासि जाचवावे वेळोवेळा | एकविस कुळांसहित ॥३॥
जे न करिती हरिची भक्ती | तयांसी जाचवावे पुढता पुढती |रघुनाथनाम जयाच्या कंठी | त्याच्या वाटे नवजावे ॥४॥
दिंडी पताका गजर टाळघोषांचा | नाद उमटतो अंबरीचा |तेथे पाड नाही काळाचा | शिंपी नामा तळपतो केशवरायाचा ॥५॥