100.
न लागती वेद शास्त्राचे पठण ।
परमार्थाची खूण वेगळिच ॥१॥
सद्गुरुसी जाई शरण सर्वभावे ।
मग तू स्वभावे ब्रह्मरूप ॥२॥
न लगती तपे व्रते अनुष्ठान ।
आत्मत्वाची खूण वेगळीच ॥३॥
न लगती देव तीर्थ क्षेत्र यात्रा ।
आगमीच्या मंत्रा धांडोळावे ॥४॥
न लगती योग याग प्राणायाम ।
साधनाचे वर्म वेगळेचि ॥५॥
नलगे ब्रह्मचर्य गृहस्थ संन्यास ।
व्रताचे हव्यास व्यर्थ तेही ॥६॥
न लगती पंचाग्नी धूम्राचे प्राशन ।
आकाश-वसन नलगे काही ॥७॥
बहेणि म्हणे एक श्री गुरूवाचोनी ।
मोक्ष तो गहनी प्राप्त नव्हे ॥८॥