2060.
कळेल हे तैसे गाईन मी तुज । जनासवे काज काय माझे ॥१॥
करीन मी स्तुती आपुले आवडी । जैसी माझ्या गोडी वाटे जीवा ॥धृपद॥
होऊनी निर्भर नाचेन मी छंदे । आपुल्या आनंदे करूनिया ॥२॥
काय करू कळा युक्ती या कुसरी । जाणिवेच्या परी सकिळका ॥३॥
तुका म्हणे माझे जयासवे काज । भोळा तो सहज पांडुरंग ॥४॥

अर्थ :
हे पांडुरंगा, हे विठ्ठला मला जसे कळेल, जसे उमगेल तसेच मी तुझे नाम गाईन, तुझे कीर्तन करिन लोकांना काय वाटेल याचा मी विचार करणार नाही कारण माझा त्यांच्यासोबत आता काही संबंध आणि काम राहिलेलेच नाही, त्यामुळे तो आता प्रश्नच उद्भवत नाही. तुझी स्तुती मी अशी करिन जेणेकरून माझ्या जीवाला ती गोड वाटेल आणि तुला आवडेल, तुला रुचेल. तसेच मी या परमार्थाच्या छंदापोटी निर्भर (आनंदभरीत) मनाने नाचेंन, गाईन कारण तूच आता माझ्या आनंदाचे एकमेव कारण झाला आहेस. तुकाराम महाराज म्हणतात हे सर्व करताना म्हणजेच देवाला साध्य करून घेण्याच्या या प्रयत्नात मी इतर कोणत्याही योजना आखणार नाही माझे ज्याच्यासोबत काम आहे, मला ज्याला प्रसन्न करून घ्यायचे आहे तो पांडुरंग अतिशय भोळा आहे, त्याला फक्त खरा भाव लागतो आणि त्यानेच तो सहज साध्य होतो.