858.
लेकराची आळी न पुरवावी कैसी । काय तयापाशी उणे जाले ॥१॥
आम्हा लडिवाळा नाही ते प्रमाण । काही ब्रम्हज्ञान आत्मस्थिती ॥धृपद॥
वचनाचा घेईन अनुभव पदरी । जे हे जनाचारी मिरविले ॥२॥
तुका म्हणे माझी भोळिवेची आटी । दावीन शेवटी कौतुक हे ॥३॥

अर्थ :
विठाबाई माऊली लेकराचा हट्ट का पूर्ण करत नाही ? तिच्या पाशी काय उणे आहे ? या विठाईच्या भक्तांना ब्रम्हज्ञान किंवा आत्मस्थिती भाव आवडत नाही. विठाई हि पतितांना पावन करणारी आहे याचा अनुभव मी घेणार आहे. तुकाराम महाराज म्हणतात माझा हा भोळे पणाचा प्रयत्न आहे पण याचे खरे कवतुक मी तुम्हाला शेवटी दाखवीन.