1000.
तंव तेथे नवल वर्तले | आकाश असे विमानी दाटले |म्हणती मूळपीठ वैकुंठ देखिले | पुंडलिकासगट ॥१॥
पंढरीहुनि आले कैसे | पुंडलिक देव सरिसे | ज्ञानदेवासवे नामा असे | आणि विष्णुभक्त अपार ॥२॥
राही रखुमाई सत्यभामा | गाई गोपाळ मेघ:श्यामा | म्हणती पाहाहो महिमा | या विष्णुभक्तांचा ॥३॥
सवे ध्रुव प्रल्हाद अंबॠषी | रुक्मांगद सूर्यवंशी | आणि ॠषीमुनी तापसी | ऐसिया समवेत वनमाळी ॥४॥
बळी भीष्म नारद |उद्धव अक्रुर विद्गद |आणि बिभीषण सुबुद्ध | हनुमंतादि करूनि ॥५॥
हा हा हु हु गंधर्व गाती | रूणुझुणु रूणुरुणु विणे वाजती | देवांगना आरतिया ओवाळिती | देवभक्तासहित ॥६॥
ऐसा शुभ काळ समयो | जाला भाग्याचा उदयो | ज्ञानदेव नामदेव पाहाहो |धन्य धन्य धरातळी ॥७॥
नामा नुघडी द्रुष्टीसी | ह्रदयी ध्यातुसे ह्रषिकेशी | ज्ञानदेवो निजमानसी |विष्णुमूर्तीसी लीन झाला ॥८॥