3526.
असो तुझे तुजपाशी । आम्हा त्यासी काय चाड ॥१॥
निरोधे का कोंडू मन । समाधान असोनी ॥धृपद॥
करावा तो उरे आट । खटपट वाढतसे ॥२॥
तुका म्हणे येउनि रागा । का मी भागा मुकेन ॥३॥

अर्थ :
देवा तुझे वागणे कसेही असले तरी ते तुझ्याजवळच असू दे आम्हाला त्याच्याशी काय कर्तव्य आहे ? माझे मन समाधानी असताना तुझ्याशी विरोध करुन मनाची कोंडी का करत बसू ? जेवढी आम्ही आटाआटी करावी तेवढी खटपट मात्र वाढते. तुकाराम महाराज म्हणतात, देवा मी तुझ्यावर रागवून माझ्या मिळणाऱ्या वाटयाला का मुकेन ?