185.
आम्हा जप नाम गुरुखूण सम । जन वन धाम गुरुचेचि ॥१॥
नेघो कल्पना न चढो वासना । एका पूर्णघना शरण जाऊ ॥२॥
तप हे अमूप नलगे संकल्प । साधिता संकल्प जवळी असे ॥३॥
निवृत्ति म्हणे मज निरोपिले धन । हेचि ब्रह्मखुण जाणिजेसु ॥४॥

अर्थ:
आम्हाला नामजपाची खुण गुरु समानच असल्यामुळे आम्हाला हे जन किंवा वन हे श्रीगुरुंचे आहेत असे वाटते. कोणत्याही कल्पनेत न अडकता वासनेला स्वतवर आरुढ न होऊ दिल्यामुळे मला त्या एकमेव पुर्णघन हरिला शरण जाता आले. तो परमात्मा आमच्या जवळ असल्याने आम्हाला साधनेचे संकल्प न करता अमुप तप करता आले.निवृतिनाथ म्हणतात, तो नाम धनाचा ठेवा श्री गुरु गहिनीनाथानी दिल्यामुळे त्या परब्रह्माची खुण आम्हाला समजली.