2269.
विठ्ठलनामाचा नाही ज्या विश्वास । तो वसे उदास नरकामध्ये ॥१॥
तयासी बोलता होईल विटाळ । नव जाये तो जळस्नान करिता ॥धृपद॥
विठ्ठलनामाची नाही ज्या आवडी । त्याची काळ घडी लेखिताहे ॥२॥
तुका म्हणे मज विठोबाची आण । जरी प्रतिवचन करिन त्यासी ॥३॥

अर्थ :
ज्याला विठ्ठल नामावरच विश्‍वास नाही तो उदास होऊन नरकामध्ये वास करतो. त्याच्या बरोबर बोलले तरी विटाळ होईल आणि तो विटाळा कितीही शुद्ध जलाने स्नान केले तरी जाणार नाही. ज्याला विठ्ठल नामाची आवड नाही त्याच्या आयुष्याची घडी स्वतः काळ मोजत आहे. तुकाराम महाराज म्हणतात अशा अधम व्यक्तीला मी जर प्रतिवचन करेल तर मला विठोबाची शपत आहे.