2270.
तया घडले सकळ नेम । मुखी विठोबाचे नाम ॥१॥
काही न लगे सिणावे । आणिक वेगळाल्या भावे । वाचे उच्चारावे । रामकृष्णगोविंदा ॥धृपद॥
फळ पावाल अवलिळा । भोग वैकुंठ सोहंळा ॥२॥
तुका म्हणे त्याच्या नावे । तोचि होइजे स्वभावे ॥३॥

अर्थ :
ज्याच्या मुखात विठोबाचे नाम सतत राहिल त्याला सर्व प्रकारचे व्रतवैकल्य केल्या सारखेच होईल. यावाचून दुसरे कोणत्याही प्रकारचा त्रास किंवा कोणत्याही प्रकारची साधना करण्याची गरज लागत नाही. केवळ आपल्या वाचेने रामकृष्ण गोविंद या नावाचा उच्चार करावा. असे केल्याने तुम्हाला अलौकिक फळ ते म्हणजे वैकुंठ सोहंळा भोगण्यास मिळेल. तुकाराम महाराज म्हणतात जो आपल्या मुखाने हरीचे नाम घेईल तो देखील हरिरूप होईल.