1603.
का रे न पवसी धावण्या । अंगराख्या नारायणा ॥१॥
अंगी असोनिया बळ । होसी खटयाळ नाट्ट्याळ ॥धृपद॥
आम्ही नरकासी जाता । काय येईल तुझ्या हाता ॥२॥
तुका म्हणे कान्हा । क्रियानष्टा नारायणा ॥३॥

अर्थ :
देवा तू अंगाराखून काम करणारा आहेस तुला जर मी हाक मारली तर तू का येत नाहीस ? देवा तुझ्या अंगी असे बळ आहे की तू हवे ते करू शकतोस तरीही तू असा खट्याळ आणि नाठाळ का झालास. ? अरे देवा आम्ही जर नरकाला गेलो तर तुझ्या हाताला काय येणार आहे ? तुकाराम महाराज म्हणतात हे कृष्णा, कान्हा, नारायणा तू क्रिया नष्ट आहेस.