1547.
करूनि जतन । कोणा कामा आले धन ॥१॥
ऐसे जाणत जाणता । का रे होतोसी नेणता ॥धृपद॥
प्रिया पुत्र बंधु । नाही तुज यांशी संबंधु ॥२॥
तुका म्हणे एका । हरीविण नाही सखा ॥३॥

अर्थ :
जतन करून ठेवलेले धन कोणत्याही मनुष्याच्या मरणानंतर कामी आले आहे काय ? अरे तु हे सर्व जाणत असून देखील न जाणता का होतोस. स्त्री पुत्र आणि बंधू यांच्याशी तुझा काहीही संबंध नाही. तुकाराम महाराज म्हणतात एका हरी वाचून तुझा कोणीही सखा नाही.