2243.
रावण मंदोदरी संवाद.

मंदोदरी सांगे रावणाप्रती । स्वप्न देखिले म्या मध्यराती । नेणो वान्नर मिळाले किती । शिळा सागरू बांधिला ॥१॥
दोघे धनुर्धर वीर वान्नर । उतरोनी आले पैलसागर । एकापरीस एकगा वीर । ते बडीवार बोलताती ॥२॥
नेणो त्याचा वळीया आला । लंकेमोवता वेढा घातला । सभामंडप उडोनि नेला । जो केला त्रिकुटेसी ॥३॥
लंकेभोंवता रुधिराचा पूर । रणी पडिला कुंभकर्ण वीर । तो तुमचा सखा सहोदर । निद्रा करी सामास ॥४॥
सत्य तुझी छेदील दश शिरे । येणे रामे रणरंगधीरे । लंका जाळोनी केली जोहरे । अंबरी तुरे गर्जताती ॥५॥
हे स्वप्न सत्य होईल जाणा । लंका दान बिभीषणा । शरण जाई रघुनंदना । नामयाच्या स्वामीसी ॥६॥