1931.
पाप पुण्य दोन्ही वाहाती मारग । स्वर्गनर्कभोग यांची पेणी ॥१॥
एका आड एक न लगे पुसावे । जेविल्या देखावे मागे भूक ॥धृपद॥
राहाटी पडिले भरोनिया रिती । होतील मागुती येती जाती ॥२॥
तुका म्हणे आह्मी खेळतोयांमधी । नाही केली बुद्धी स्थिर पाहो ॥३॥

अर्थ :
या जगामध्ये पाप आणि पुण्य हे दोन मार्ग आहेत चांगल्या कर्मा़नुसार स्वर्ग आणि वाईट कर्मानुसार नर्क प्राप्त होतो होतो. स्वर्ग आणि नर्क एकामागून एक कसे येते ज्याप्रमाणे आपण जेवलो की आपल्याला काही वेळानंतर पुन्हा भूक लागते व भूक लागली की आपण पुन्हा जेवण करतो अगदी त्याप्रमाणे- हे कोणाला विचारावे लागत नही. रहाटाला लावलेली गाडगे जसे एक भरले की दुसरे रिकामे होते आणि दुसरे भरले की पुन्हा ते ही रिकामे होते व ते ही भरते असे एका मागे एक चालू राहते. तुकाराम महाराज म्हणतात त्याप्रमाणे आम्ही पाप आणि पुण्य या खेळामध्ये खेळत आहोत परंतु पाप करावे की पुण्य करावे यासाठी बुद्धी स्थिर केली नाही.