1572.
प्रपंचरचना सर्वहि भोगुनि त्यागीली ।
अनुतापाचे ज्वाळी देहबुध्दी हविली ।
वैराग्याची निष्ठा प्रगटूनि दाखविली ।
अहंता ममता दवडुनि निजशांति वरिली ॥१॥
जयजयाजी सदगुरुतुकया दातारा ।
तारक तू सकळांचा जिवलग सोयरा ॥ध्रु॥
हरिभक्तिचा महिमा विशेष वाढविला ।
विरक्तिज्ञानाचा ठेवा उघडुनि दाखविला ।
जगदोध्दारालागी उपाय सुचविला ।
निंदक दुर्जनांचा संदेह निरसिला ॥जय ॥२॥
तेरा दिवस बह्या रक्षूनिया उदकी ।
कोरडयाची काढूनी दाखविल्या शेखी ।
अपार कविताशक्ति मिरवुनि इहलोकी ।
कीर्तनश्रवणे तुमच्या उध्दरती जन लोकी जय ॥३॥
बाळवेष घेऊनि श्रीहरी भेटला ।
विधिचा जनिता तोचि आठवा हा दिधला ।
तेणे ब्रहमानंदे प्रेमा डोलविला ।
न तुके म्हणुनी तुका नामहं गौरविला ॥ जय ॥ ॥४॥
प्रयाणकाळी देवे विमान पाठविले ।
कलिच्या काळामाजी अदभुत वर्तविले ।
मानवदेह घेऊनि निजधामा गेले ।
निळा म्हणे सकळ संत तोषविले ॥ जय ॥ ॥५॥

संत निळोबाराय गाथा समाप्त.