1512.
अवघाचि संसार करीन सुखाचा | जरी जाला दुःखाचा दुर्धर हा ॥१॥
विठोबाचे नाम गाईन मनोभावे | चित्त तेणे नांवे सुख पावे ॥२॥
इंद्रियांचे कोड सर्वस्वे पुरती | मनाचे मावळती मनोधर्म ॥३॥
श्रवणी श्रवणा नामाचा प्रबंधा | नाइके स्तुतिनिंदा दुर्जनाची ॥४॥
कुंडले मंडित श्रीमुख निर्मळ | पाहता हे डोळे निवती माझे ॥५॥
विटेसहित चरण धरीन मस्तकी | तेणे तनु सुखी होईल माझी ॥६॥
संतसमागमे नाचेन रंगणी | तेणे होईल धुणी त्रिविध तापा ॥७॥
नामा म्हणे सर्व सुखाचा सोईरा | न विसंबे दातारा क्षणभरी ॥८॥