3681.
चोखामेळियाची ऐकोनी करुणा । चालिले भोजना देवराव ॥१॥ नामदेवासहित अवघे गणगंधर्व । इंद्रादिक देव चालियले ॥२॥ जाउनी नारद सांगे चोखियासी । तुझिया घरासी येती देव ॥३॥ ऋध्दिसिध्दि आल्या चोखियाचे घरी । जाहला ते सामोग्री भोजनाची ॥४॥ रुक्मिणीसहित आला पंढरीनिवास । चोखियाचे घरास आले वेगी ॥५॥ चोखामळा गेला पुढे लोटांगणी । उचलोनि देवांनी आलंगिला ॥६॥ एका जनार्दनी ऐसा चोखियाचा भाव । जाणोनी आले देव भोजनासी ॥७॥