1721.
उत्तम घालावे आमुचिये मुखी । निवारावे दुःखी होऊ नेदी ॥१॥
न बैसे न वजे जवळूनि दुरी । मागे पुढे वारी घातपात ॥धृपद॥
नाही शंका असो भलतिये ठायी । मावळले पाही द्वैताद्वैत ॥२॥
तुका म्हणे भार घेतला विठ्ठले । अंतरी भरले बाह्य रूप ॥३॥

अर्थ :
हा पाडूरंग जे उत्तम आहे तेच आमच्या मुखामध्ये घालतो ते म्हणजे हरीनाम आणि आम्हाला कधीही हा पाडूरंग दु:खी होऊ देत नाही आमचे सर्व दु:ख निवारण करतो. हा पाडूरंग कधी बसत नाही व कधीही आमच्याजवळून दूर जात नाही केवळ आमच्यासाठी व आमच्यावर मागेपुढे होणाऱ्या घातपाताचे निवारणही हा करतो. आता आम्हाला कसल्याही प्रकारचे भय राहीले नाही कारण आमच्या मनातील द्वैत अद्वैत मावळले आहे. तुकाराम महाराज म्हणतात, “या पाडूरंगानेच आमच्या योगक्षेमाचा भार घेतला आहे व त्याचेच रुप आमच्या अंतरंगात व बाह्यरंगात भरले आहे.