421.
गौळणी-रंगणी परब्रह्म खेळतो ।
गोमयी रूळतो बाळकृष्ण ॥१॥
क्षीरसागरीचे सुख सांडोनी परते ।
अनुसरला येथे भक्तीलागी ॥२॥
नवल हे आवडी न कळे निजवर्म ।
वेडावले ब्रह्म भक्तीलागी ॥३॥
अश्वमेधादिक यज्ञाचे आहुते ।
न पाहे तयाचे आळुमाळ ॥४॥
तो हा गोपाळा-करीचे उच्छिष्ट ।
अन्न खावया लागून वाट पाहे ॥५॥
वेद श्रुती वर्णिता न घेचि पै चित्ती ।
श्रमलिया म्हणती नेति नेति ॥६॥
बहेणि म्हणे फुका सापडला हरी ।
प्रेमसूत्रदोरी गळा लावू ॥७॥