3078.
ऐसे नाना भेष घेऊनी हिंडती । पोटासाठी घेती प्रतिग्रह ॥१॥
परमार्थासी कोण त्यजी संवसार । सांगा पा साचार नांव त्याचे ॥२॥
जन्मता संसार त्यजियेला शुके । तोचि निष्कळंक तुका म्हणे ॥३॥

अर्थ :
अशा प्रकारे पोटासाठी लोक विविध प्रकारचे वेष घेऊन दारोदारी हिंडत असतात आणि दान घेत असतात. अहो परमार्थासाठी संसाराचा त्याग कोण करणार आहे एखादयाचे तरी नांव सांगा ? तुकाराम महाराज म्हणतात, जन्मत: संसाराचा त्याग केवळ शुकाचार्यानेच केला त्यामुळे सर्वांमध्ये तेच एक निर्दोष आहेत.