3673.
(काला व खेळया संबंधीचे अभंग)
हा रस आनंदाचा । घोष करा हरीनामाचा । कोण हा दैवाचा । भाग पावे येथील ॥१॥
पुण्य पाहिजे बहुत । जन्मांतरींचे संचित । होईल करीत । आला अधिकारी तो ॥धृपद॥
काय पाहाता हे भाई । हरुषे नाचा धरा घाई । पोटभरी काही । घेता उरी न ठेवा ॥२॥
जे सुख दृष्टी आहे । तेंच अंतरी जो लाहे । तुका म्हणे काय । कळिकाळ ते बापुडे ॥३॥

अर्थ :
हरिनामाचा जयघोष करण्याच्या भक्तिरसात मोठा आनंद भरलेला आहे जो भाग्यवान असेल, त्याच्या वाटेल तो येईल. अनेक जन्माची पुण्याई असलेला भक्तिचा अधिकारी होईल. अरे बंधुनो, नुसते बघत राहु नका आता घाई धरा आणि आनंदाने नामाच्या छंदात नाचा भक्तिरसाने मन तृप्त होईपर्यंत त्याचे सेवन करा त्यात संकोच करू नका. तुकाराम महाराज म्हणतात, हरिच्या सगुण रूपाच्या दर्शनाने सुख अंत:करणात ठसेल कळिकाळहि त्याच्यापुढे हतबल आहे.