2094.
कथा सुख करी कथा मुक्त करी । कथा याची बरी विठोबाची ॥१॥
कथा पाप नासी उद्धरिले दोषी । समाधि कथेसी मूढजना ॥धृपद॥
कथा तप ध्यान कथा अनुष्ठान । अमृत हे पान हरीकथा ॥२॥
कथा मंत्रजप कथा हरी ताप । कथाकाळी काप कळीकाळासी ॥३॥
तुका म्हणे कथा देवाचे ही ध्यान । समाधि लागोन उभा तेथे ॥४॥

अर्थ :
या विठोबाची कथा दुःख हरण करते तसेच मुक्त ही करते त्यामुळे विठोबाची कथा फार चांगली आहे. कथेमध्ये इतकी शक्ती आहे की ती सर्व प्रकारचे पाप नाश करते तसेच अनेक दोषी असे आहेत की त्यांचा केवळ कथेने उध्दार झाला आहे तसेच कितीही मूर्ख मनुष्य असला तरी तो एकाग्र चित्ताने कथेमध्ये बसला तर त्याला समाधी लागत असते. कथा तप आहे कथा ध्यान आहे, कथा अनुष्ठान ही आहे अमृत पानासारखी हरी कथा आहे. कथा म्हणजे एक प्रकारचे मंत्रजप आहे, त्रिविधताप हरणारी आहे आणि कथेच्या काळी काळला देखील भीती वाटते थरथर कळिकाळ कापत असतो. तुकाराम महाराज म्हणतात कथेच्या वेळी देवाला देखील ध्यान लागते आणि समाधी अवस्था लागून देव कथेत उभा असतो.