2679.
माझे तो स्वभाव मज अनावर । तुज ही देता भार काही नव्हे ॥१॥
ऐसे कळो आले मज नारायणा । जागृती स्वपना ताळ नाही ॥धृपद॥
संपादितो तो अवघा बाह्य रंग । तुझा नाही संग अभ्यंतरी ॥२॥
तुका म्हणे सत्या नाही पाठी पोट । असते निघोंट एकी जाती ॥३॥

अर्थ :
देवा माझा स्वभाव मला अनावर झाला आहे आणि त्यामुळेच मी माझा भार तुझ्यावर घातला तर तुही काही मदत करीत नाहीस. हे नारायणा माझ्या जागृतीत आणि स्वप्नात ताळमेळच नाही हे मला कळून आले आहे. हे नारायणा मी बाहयरंगाने तुझा भक्त आहे असे सोंग केवळ संपादन करीत आहे परंतू माझ्या अंत:करणात पाहिले तर तुझी सोबतच नाही. तुकाराम महाराज म्हणतात, सत्याला दोन बाजू नसतात पाठ नसते आणि पोट नसते सत्य हे परिपूर्ण असते.