2556.
शक्ती द्याव्या देवा । नाही पार्थीवाची सेवा ॥१॥
मुख्य आहे ऐसा धर्म । जाणते हो जाणा वर्म ॥धृपद॥
मना पोटी देव । जाणे जैसा तैसा भाव ॥२॥
तुका म्हणे सोसे । लागे लाविल्याचे पिसे ॥३॥

अर्थ :
देवा परमार्थ करण्याविषयी मला शक्ती द्याव्यात आणि देह व देहा संबंधित असलेल्या प्रत्येक जड जीवाची सेवा न करण्याची मला इच्छा द्यावी. परमार्थ करण्यासाठी देहा संबंधी असणार्‍या कोणत्याही देवाची सेवा न करणे हेच परमार्थ करण्याचा मुख्य धर्म आहे. आणि हेच तुम्ही जाणते लोकांनो जाणून घ्या. आपल्या मनातच जो भक्ति भाव असेल तसाच देव होत असतो हे जाणून घ्यावे. तुकाराम महाराज म्हणतात आपल्या मनाने ज्या गोष्टीविषयी छंद लावून घेतला असेल. त्याच गोष्टी विषयी आपणास वेड लागत असते.