2561.
कई ऐसी दशा येईल माझ्या आंगा । चित्त पांडुरंगा झुरतसे ॥१॥
नाठवुनि देह पायाचे चिंतन । अवसान ते क्षण नाही मधी ॥धृपद॥
कई ऐसा पात्र होईन लाभासी । नेणो हृषीकेशी तुष्टईल ॥२॥
तुका म्हणे धन्य मानीन संचित । घेईन ते नित्य प्रेमसुख ॥३॥

अर्थ :
पांडुरंगा माझ्या अंगी अशी दशा केव्हा येईल यासाठी माझे चित्त झुरत आहे, की मला माझ्या देहाची आठवणच राहणार नाही केवळ तुमच्या पायाचे चिंतन मला होईल आणि चित्तामध्ये एक क्षणभर देखील खंड पडणार नाही अशी दशा माझी केव्हा होईल हे पांडुरंगा. मी अशा लाभास केव्हा पात्र होईल की जेणेकरून ऋषिकेश माझ्यावर संतुष्ट होईल. तुकाराम महाराज म्हणतात असे जर झाले तर मी माझे पूर्व संचित धन्य मानेल.