2018.
करिता कोणाचे ही काज । नाही लाज देवासी ॥१॥
बरे करावे हे काम । धरिले नाम दीनबंधु ॥धृपद॥
करुनि अराणूक पाहे । भलत्या साहय व्हावया ॥२॥
बोले तैसी करणी करी । तुका म्हणे एक हरी ॥३॥

अर्थ :
देवाला कोणत्याही भक्ताचे कोणत्याही प्रकारचे काम करताना लाज वाटत नाही. भक्ताचे कोणतेही काम करणे हेच त्याला चांगले वाटते त्यामुळे त्याला दीनबंधू त्याने स्वतः नांव धारण केले. संकट प्रसंगी भक्तांना तो नेहमी मदत करतो आणि कोणताही भक्त असो त्याला संकट काळी हा देव साह्य करतोच. तुकाराम महाराज म्हणतात जसे बोलतो तसेच करणारा हा एक हरीच आहे.