777.
रामनामी भाव न धरिती कोणी । नाना मंत्र तंत्र घेती जनी ।
सकुडी कुंटणी वैकुंठासी नेली । अवचटे राम वदनी ॥१॥
रामनाम न मानिती जनी । सैर समाधि हरिकीर्तनी ॥धृ.॥
वारितां नाम प्रल्हाद स्मरे । त्याचे चुकविले नाना घात ।
कोरडिये काष्ठी नर मृग जाला । भक्ता साह्य जगन्नाथ ॥२॥
अभिलाषें नाम अजामेळ स्मरे । तो सोडिला यमकिंकरीं ।
मागील किल्मिष निःशेष जाळिलें । ऐसी नामाची ही थोरी ॥३॥
उफाराटे अक्षरीं रामु नारदमुनी । वाल्मिकासी उपदेशी ।
नष्ट वाटपाडा पुनीत जाला । या महाकवि म्हणविंती त्यासी ॥४॥
रामनाम कीर्तनी कैसे सुख आहे । हे शिवची जाणे साचे ।
दोचि अक्षरी काशी मुक्त केली । तारक ब्रह्मा हे त्यांचे ॥५॥
लाजेच्या संकटीं द्रौपदी नाम स्मरे । देवो वर्षला तिसी अंबरें ।
वैरी याचे शिरी पाउल आणिला । नामे भक्तकाज सरे ॥६॥
नामाचेनी बळे पाप पुढे पळे । कर्माकर्म तेथे जळे ।
एका जनार्दनी नाममात्रे । निजीं निजसुखाचे सोहळे ॥७॥