1179.
हरी म्हणता गति पातके नासती । कळिकाळ कापती हरी म्हणता ॥१॥
हरी म्हणता भुक्ती हरी म्हणता मुक्ती । चुके यातायाती हरी म्हणता ॥धृपद॥
तपे अनुष्ठाने न लगती साधने । तुटती बंधने हरी म्हणता ॥२॥
तुका म्हणे भावे जपा हरीचे नाम । मग काळयम शरण तुह्मा ॥३॥

अर्थ :
हरीचे नाम घेतल्याने सर्व पापाचे नाश होतात. आणि सद्गती प्राप्त होते आणि कळिकाळ देखील हरिनाम घेतल्यावर थरथर कापतो. हरी म्हटल्यानंतर भुक्ती मुक्ती प्राप्त होते आणि जन्म मरण रुपी येरझार नाहीसे होतात संपतात. हरिनाम घेतल्यानंतर संसार बंधने तुटतात आणि तप, अनुष्ठान असे इतर कोणतेही साधन करण्याची गरज लागत नाही. तुकाराम महाराज म्हणतात भक्ती भावपूर्वक हरिनाम घेतल्यानंतर काळात देखील तुम्हाला शरण येणार.