3645.
(सीताशोक)
राम म्हणता तरे जाणता नेणता । हो का यातिभलता कुळहीन ॥१॥
राम म्हणता न लगे आणीक सायास । केले महा दोष तेही जळती ॥धृपद॥
राम म्हणे तया नये जवळी भूत । कैचा यमदूत म्हणता राम ॥२॥
राम म्हणता तरे भवसिंधुपार । चुके वेरझार म्हणता राम ॥३॥
तुका म्हणे हे सुखाचे हे साधन । सेवी अमृतपान एका भावे ॥४॥

अर्थ :
जो मनुष्य मुखाने रामनाम घेतो मग तो ज्ञानी असो किंवा अज्ञानी असो कोण हीन असो किंवा कोणत्याही जातीचा असो त्याचा उध्दार होतोच. रामनाम घेण्यासाठी कोणत्याही प्रकारचे सायास, कष्ट करावे लागत नाही रामनामाचे उच्चार केले असता महादोषही जळून जातात. मुखाने राम म्हटले तर जवळ भूतही येत नाही आणि यमदूतही येत नाहीत. मुखाने रामनाम घेतले की भवसिंधू तरुन पार जाता येते आणि जन्ममरणाचे येरझार चुकतात. तुकाराम महाराज म्हणतात, हे लोकहो रामनाम हेच सुखाचे साधन आहे व तेच नामामृतपान एकनिष्ठ भक्तीभावाने सेवन करा.