1939.
भक्तीभावे आह्मी बांधिलासे गाठी । सादावितो हाटी घ्या रे कोणी ॥१॥
सुखाचिया पेंठे घातला दुकान । मांडियेले वान रामनाम ॥धृपद॥
सुखाचे फुकाचे सकळाचे सार । तरावया पार भवसिंधु ॥२॥
मागे भाग्यवंत जाले थोर थोर । तिही केला फार हाचि साटा ॥३॥
खोटे कुडे तेथे नाही घातपात । तुका म्हणे चित्त शुद्ध करी ॥४॥

अर्थ :
आम्ही भक्ती भाव आमच्या पदरात बांधला आहे आणि संसाराच्या बाजारांमध्ये कोणी भक्तिभाव घेतो का असे हाक देत सुटलो आहे. आम्ही सुखाच्या बाजारपेठेमध्ये परमार्थिक दुकान टाकले आहे आणि या दुकानांमध्ये रामनामाचा माल ठेवलेला आहे. हे राम नाम साधन म्हणजे सुखाचे फुकटचे आणि सगळ्या साराचे चे ही सार व भवसिंधु पार तरून जाण्यासाठी अतिशय उत्कृष्ट आहे. मागे झालेले थोर भगवद् भक्त ते भाग्यवंत आहेत व त्यांनीही याच रामनाम मालाचा फार मोठ्या प्रमाणात साठा केला होता. तुकाराम महाराज म्हणतात या माला मध्ये कोणत्याही प्रकारचे खोटेपणा वाईटपणा आणि घातपात होण्याची संभावना तर नाहीच आणि तुमचे चित्त शुद्ध असेल तर हा माल तुम्हाला लागेल तेवढा तुम्ही भरा.