60.
का सांडिसी गृहाश्रम । का सांडिसी क्रियाकर्म ।
कासया सांडिसी कुळींचे धर्म । आहे ते वर्म वेगळेची ॥१॥
भस्मउधळण जटाभारु । अथवा उदास दिगंबरु ।
न धरी लोकांचा आधारु । आहे तो विचारु वेगळाची ॥२॥
जप तप अनुष्ठान । क्रिया कर्म यज्ञ दान ।
कासया इंद्रिया बंधन । आहे ते निधान वेगळेंची ॥३॥
वेदशास्त्र जाणीतले । आगमी पूर्ण ज्ञान झाले ।
पुराणा मात्र धांडोळिले । आहे ते राहिले वेगळेंची ॥४॥
शब्दब्रम्हे होसी आगळा । म्हणसी न भिये कळिकाळा ।
बोधेंविण सुख सोहंळा । आहे तो जिव्हाळा वेगळाची ॥५॥
याकारणे श्रीगुरुनाथु । जंव मस्तकी न ठेवी हातु ।
निवृत्तिदास असे विनवितु । तंव निवांतु केवि होय ॥६॥