990.
काळाचिया सत्ता ते नाही घटिका । पंढरीनायका आठविता ॥१॥
सदाकाळ गणना करी आयुष्याची । कथेचे वेळेची आज्ञा नाही ॥धृपद॥
याकारणे माझ्या विठोबाची कीर्ती । आहे हे त्रिजगती थोर वाट ॥२॥
तुका म्हणे जन्मा आलियाचे फळ । स्मरावा गोपाळ तेचि खरे ॥३॥

अर्थ :
आपण ज्या वेळेस पांडुरंगाचे स्मरण करतो त्या वेळे पर्यंत काळाची सत्ता आपल्यावर चालत नाही. काळ हा सतत आयुष्याची गणना करत असतो जेवढा वेळ कथेत जातो त्या वेळेची गणना करण्याची त्याला आज्ञा नसते. म्हणूनच माझ्या या विठोबाची कीर्ती आकाश पृथ्वी पाताळ या ठिकाणी श्रेठ आहे. तुकाराम महाराज म्हणतात जन्माला आल्याचे फळ म्हणजे सदा सर्व काळ या हरीचे स्मरण करा.