989.
काय माझे नेती वाईट म्हणोन । करू समाधान काशासाठी ॥१॥
काय मज लोक नेतील परलोका । जाता कोणा एक निवारील ॥धृपद॥
न म्हणे कोणासी उत्तम वाईट । सुखे माझी कूट खावो मागे ॥२॥
सर्व माझा भार असे पांडुरंगा । काय माझे जगासवे काज ॥३॥
तुका म्हणे माझे सर्व ही साधन । नामसंकीर्त्तन विठोबाचे ॥४॥

अर्थ :
मी जर लोकांना वाईट म्हणू लागलो तर लोक माझे काय नेतील ? म्हणून मी या लोकांचे समाधान कशा साठी करू. आणि समजा मी त्यांचे समाधान करू लागलो तर हे लोक मला परलोकी नेतील काय किंवा मी परलोकी चाललो तर मला थांबवतील काय ? मी कोमालाही उत्तम किंवा वाईट म्हणणार नाही मग माझ्या मागे माझी कोणीही खुशाल निंदा करोत. माझा सर्व भार पांडुरंगावर आहे या जगाशी माझे काय काम ? तुकाराम महाराज म्हणतात एक विठोबाचे नामसंकीर्तन हे च माझे सर्व साधन आहे.