3200.
संतांनी सरता केलो तैसेपरी । चंदनी ते बोरी व्यापियेली ॥१॥
गुण दोष याती न विचारिता काही । ठाव दिला पायी आपुलिया ॥२॥
तुका म्हणे आले समर्थाच्या मना । तरि होय राणा रंक त्याचा ॥३॥

अर्थ :
चंदनाच्या झाडाजवळ जर बोरीचे झाड असेल तर चंदनाच्या सुगंधाने ते बोरीचे झाडही व्यापून जाते त्याप्रमाणे संतांच्या संगतीमध्ये मी राहिलो आणि संतांनी देखील जगामध्ये मला त्यांच्यासारखेच सरते केले. संतांनी माझ्या गुण, दोष, जात याचा काहीही विचार केला नाही त्यांनी मला त्यांच्या पायाच्या ठिकाणी आश्रय दिला आहे ठावठिकाणा दिला आहे. तुकाराम महाराज म्हणतात, जर समर्थाच्या मनात आले तर दरिद्री मनुष्याचा देखील राजा होतो.