1280.
निर्गुणपणांचा अभिमान सांडिला | निगम लाजविला नारायणा ॥१॥
कपट करोनि भक्तांसि तारिसी | तुझा तू ठकसी पंढरिराया ॥२॥
ठकूनी पुंडलिकासी न्यावया वैकुंठासी | या बुद्धी आलासी पंढरिये ॥३॥
तंव त्या भक्तराजे धरियेले चित्ते | परतोनि मागुते जाऊ नेदी ॥४॥
अठ्ठावीस युगे गेली विचारिता | निर्गम सर्वथा नव्हे देवा ॥५॥
मग कटावरी कर धरोनिया धीर | उभा निरंतर राहिलासी ॥६॥
सर्व घे प्रेमे ते हिरोनि बांधिले | विचारे साधिले कोणे कोणा ॥७॥
द्वारी द्वारपाळ जालासी अंकित | सांग बुद्धीमंत कोण ऐसा ॥८॥
नाथिलेनि करिसी आपणा गोंविसी | बोल का ठेविसी नामयाते ॥९॥
गोणाई म्हणे तुझे नकळे विंदान | देई कृपादान बाळ माझे ॥१०॥