949.
महा मुक्ति क्षेत्र तीर्थाचे तारक | उपमेसि आणीक नाही दुजे ॥१॥
ते हे पंढरपूर प्रेमाचे भांडार | नामे निरंतर गर्जंतसे ॥२॥
येवढ तीर्थ जवळी असता पै समर्थ | कोण भाग्यहत दैन्य भाकी ॥३॥
जीवन्मुक्त ज्ञानी येथे पुंडलिक मुनि | बैसलासे ध्यानी परलक्षी ॥४॥
योग्यांचे हृदयींचे निजध्यान नेटके | ते जयाचेनि सुखे वेडावले ॥५॥
पुण्यपावन भीमा दक्षिणवाहिनी | अमृत संजीवनी पुण्यराशी ॥६॥
आनंदरसकूपिका प्रत्यक्ष चंद्रभागा | दर्शने न या गा गर्भवासा ॥७॥
स्वर्गी मंदाकिनी लाजोनि राहिली | पाताळी प्रवेशली भोगावती ॥८॥
सहस्त्रभाग भेणे होउनी भागीरथी | सागरा मिळती जाली वेगी ॥९॥
भक्तजन भाग्याची की सुख आरोग्याची | जे का वैराग्याची जन्मभूमी ॥१०॥
तेथे हरिखे निर्भर नामा संतांचे संगती | गीती गाय कीर्ति विठोबाची ॥११॥