2802.
पराधीन माझे करूनिया जीणे । सांडी काय गुणे केली देवा ॥१॥
उदार हे कीर्ति असे जगामाजी । का ते ऐसे आजि पालटिले ॥धृपद॥
आळवितो परी न पुरेचि रीग । उचित तो त्याग नाही तुम्हा ॥२॥
तुका म्हणे का बा मुळींच व्यालासी । ऐसे का नेणसी पांडुरंगा ॥३॥

अर्थ :
देवा माझे जीने हे संचित कर्माचा आधीन झाले आहे म्हणजे मी पराधीन झालो आहे असे तुम्ही का बरे केले आहेत माझी अशी हेळसांड तुम्ही का केली? देवा जगामध्ये तुमची किर्ती म्हणजे तुम्ही उदार आहात अशी आहे मग माझ्या बाबतीत तुम्ही असा तुमचा रंग का पालटला आहे? देवा मी तुम्हाला खूप आळवित आहे परंतु माझे आळवणे तुमच्या पर्यंत पोहोचत नाही माझा असा त्याग करणे हे तुमच्यासाठी उचित नाही. तुकाराम महाराज म्हणतात देवा मुळात तुम्ही मला जन्मच का दिला आणि मला जन्म दिला नसता तर माझा कोणत्याही प्रकारचा भार तुमच्यावर आलाच नसता हे तुम्हाला पूर्वीच समजले नाही काय?