3431.
(व्यभिचारिणी स्त्रीचे रूपक)
सर्व सुख आम्ही भोगू सर्व काळ । तोडियेले जाळ मोहपाश ॥१॥
याचसाठी सांडियेले भरतार । रातलो या परपुरुषाशी ॥२॥
तुका म्हणे आता गर्भ नये धरू । औषध जे करू फळ नव्हे ॥३॥

अर्थ :
(महाराजांची बुध्दी कृष्णरुपामध्ये इतकी तल्लीन झाली की ते म्हणतात)आम्ही सर्व प्रकारचे सुख सर्वकाळ भोगू कारण आम्ही सर्व प्रकारचे जाळे व मोहपाश तोडून टाकले आहेत. यासाठीच आम्ही प्रपंचरुपी संसाररुपी आमचा नवरा आम्ही सोडून दिला आहे व परपुरुष असा हरी याच्याशी आम्ही रत झालो आहोत. तुकाराम महाराज म्हणतात, आता आम्ही पुन्हा संसाररुपी नवऱ्याकडे जाऊन जन्ममरणरुपी येरझार गर्भधारणा करुन घेणार नाही त्यापेक्षा आम्ही ज्ञानरुपी औषध सेवन करु असे केल्याने आम्हाला जन्ममरणरुपी बाळ होणारच नाही.