3339.
आंधळ्यासि जन अवघेचि आंधळे । आपणासि डोळे दृष्टी नाही ॥१॥
रोग्या विषतुल्य लागे हे मिष्टान्न । तोंडासि कारण चवी नाही ॥२॥
तुका म्हणे शुद्ध नाही जो आपण । तया त्रिभुवन सर्व खोटे ॥३॥

अर्थ :
आंधळयाला दृष्टी नसल्यामुळे सर्व जगच आंधळे भासते. आजारी माणसाच्या तोंडाला चव नसल्यामुळे सुग्रास भोजन त्याला विषतुल्य भासते. तुकाराम महाराज म्हणतात ज्याचे चित्त शुद्ध नाही, त्याला सारे त्रभुवन खोटे भासते.