212.
कान्होबा खेळ खेळू रानीं । तुम्ही आम्ही दोघे मिळोनी ॥१॥
हमामा रे भाई हमामा ॥धृ.॥
हमामा घाली मत्स्य अवतारी । शंखासुरा धरुनी मारी ॥२॥
हमामा घाली समुद्रतीरी । धरुनी पर्वत पाठीवरी ॥३॥
हमामा घाली नानापरी । पृथ्वी धरुनी दाढेवरी ॥४॥
हमामा घाली हिरण्य कश्यपाघरीं । प्रगटुनी स्तंभामाझारीं ॥५॥
हमामा घाली बळीचे द्वारी । आपण होऊनि भिकारी ॥६॥
हमामा घाली परशु हाती । निःक्षात्री पृथ्वी केली जगती ॥७॥
हमामा घाली लंकेवर । केला बिभीषण राज्यधर ॥८॥
हमामा घाली नंदाघरीम । गोपाळ नाचती गजरीं ॥९॥
हमामा घाली भीमातटीं । उभाचि धरुनि कर कटी ॥१०॥
एका जनार्दनी खेळ । नानापरीचा आकळ ॥११॥