21.
श्रवणे कीर्तने झाले ते पावन । सनकादिक जाण परम भक्त ॥१॥
जाली ते विश्रांती याचका सकळा । जीवी जीवनकळा श्रीमूर्तीरया ॥२॥
पादसेवने अक्रूर जाला ब्रम्हरूप । प्रत्यक्ष स्वरूप गोविंदाचे ॥३॥
सख्यपणे अर्जुन नरनारायण । सृष्टी जनार्दन एकरूप ॥४॥
दास्यत्व निकट हनुमंते पै केले । म्हणुनी देखिले रामचरण ॥५॥
बळी आणि भीष्म प्रल्हाद नारद । बिभीषणावरद चंद्रार्क ॥६॥
व्यास आणि वशिष्ठ वाल्मिकादिक । आणि पुंडलिक शिरोमणी ॥७॥
शुकादिक योगी रंगीले श्रीरंगी । परिक्षितीच्या अंगी ठसावले ॥८॥
उद्धव यादव आणि ते गोपाळ । गोपिकांचा मेळ ब्रम्हरूप ॥९॥
अनंत भक्त राशी तरले वानर । ज्ञानदेवा घर चिदानंदी ॥१०॥