133.
नाही त्या आचारु सोंविळा परिवारु । गोकुळी साचारु अवतरला ॥१॥
गाई चारी हरी गोपवेष धरी । नंदाचा खिलारी ब्रह्म झाले ॥२॥
ध्याताति धारणे चिंतिताती मौन्ये । योगियांची मने हारपति ॥३॥
निवृत्ति म्हणे ते वसुदेवकुळी । अवतार गोकुळी घेतलासे ॥४॥

अर्थ:
ते परब्रम्ह निर्गुण असल्यामुळे ते कर्मविरहित व विटाळ नसलेले सोवळे स्वरुप असुन तेच सगुण साकार होईन गोकुळात अवतरले आहे. तेच परब्रम्ह यमुनातटी गायी चारते व ब्रह्माने जेंव्हा नंदाची खिलारे चोरली तेंव्हा त्या खिलारांचे ही रुप त्यानेच घेतले.योगी जेंव्हा मौन धारण करुन त्याचे ध्यान करतात तेंव्हा त्यांचे मन ही त्या स्वरुपात हारपुन जाते. निवृत्तिनाथ म्हणतात, त्या रुपाने गोकुळात येऊन नंदाघरी आपला अवतार धारण केला आहे.