2213.
आता न म्हणे मी माझे । नेघे भार काही ओझे ॥१॥
तू चि तारिता मारिता । कळो आलासी निरुता ॥धृपद॥
अवघा तू चि जनार्दन । संत बोलती वचन ॥२॥
तुका म्हणे काही । माझे तिळभरी नाही ॥३॥

अर्थ :
देवा यापुढे मी माझ्या देहाला मी आणि देहासंबंधी कोणालाही माझे म्हणणार नाही आणि असे म्हणून नसते कोणतेच भार मी माथ्यावर घेणार नाही. कारण देवा तूच मला तारणारा आहेस व तूच मला मारणारा आहेस हे मला चांगले समजले आहे. तूच जनार्धन आहेस असे संत त्यांच्या वचनाने बोलत असतात. तुकाराम महाराज म्हणतात या जगतामध्ये माझे तीळ भर ही काहीच नाही असेच मी म्हणणार आहे.