158.
चिंतिता साधक मनासि ना कळे । तो गोपिकासी आकळे करिता ध्यान ॥१॥
देखिलागे माये सगुणागुणनिधि । यशोदा गोविंदी प्रेम पान्हा ॥२॥
न माये सर्वाघटी आपणचि सृष्टी । तो यमुनेच्या तटी गायी चारी ॥३॥
निवृत्ति साधन कृष्णाचे रूपडे । ब्रह्मांडा एवढे तदाकार ॥४॥

अर्थ:
ज्याचे चिंतन सतत करणाऱ्या साधकाला तो सापडत नाही तो परमात्मा गोपिकांच्या प्रेमभक्तिमुळे सतत त्यांच्या ध्यानात असतो. ज्याला यशोदा आपला प्रेमपान्हा पाजते त्या सगुण गुणनिधीला मी पाहिला. यमुनेच्या तटावर गायी चारणारे ते परब्रह्म सृष्टीतील कोणत्याच स्वरुपात बंधिस्त होत नाही. निवृतिनाथ म्हणतात, त्याच कृष्णरुपाला माझे नामसाधन बनवल्यामुळे सर्व ब्रह्मांड मला तदाकार एकरुप दिसत आहे.