2180.
वेदाचा तो अर्थ आम्हासीच ठावा । येरांनी वाहावा भार माथा ॥१॥
खादल्याची गोडी देखिल्यासी नाही । भार धन वाही मजुरीचे ॥धृपद॥
उत्पित्त पाळण संहाराचे निज । जेणे नेले बीज त्याचे हाती ॥२॥
तुका म्हणे आम्हा सापडले मूळ । आपणची फळ आले हाती ॥३॥

अर्थ :
वेदांचा खरा अर्थ आम्हालाच माहित आहे इतरांनी केवळ शब्दांचा आणि अहंकार व वेद पठणाचा भार माथ्यावर व्हावा एवढेच. अन्न खाल्याची गोडी अन्न खाणाऱ्यालाच समजते केवळ पाहणाऱ्यांला नाही आणि धन वाहून नेले तरी ते पैसे मजुराचे नसतात तो केवळ भार वाहत असतो. जगाची उत्पत्ती पालन संहार करणारा हरी त्याचे नीज स्वरूपाचे बीज जो आपल्या हातामध्ये ठेवतो त्यालाच वेदाचा खरा अर्थ समजत असतो. तुकाराम महाराज म्हणतात सर्व साधनाचे मूळ बीज म्हणजे हा हरी आहे आणि तोच आम्हाला सापडला आहे त्यामुळे सर्व वेदार्थ रुपी फळ आमच्या हाती आपण होऊनच आले आहेत.