3488.
श्रीनिवृत्तिनाथांची स्तुति - अभंग ३४८८ ते ३५०६

विश्वाचा तो गुरु । स्वामी निवृत्ति दातारु ॥१॥
आदिनाथापासून । परंपरा आली जाण ॥२॥
ज्ञानदेवा ज्ञान दिले । चांगदेवाते बोधिले ॥३॥
तोचि बोध माझे मनी । राहो एका जनार्दनी ॥४॥
‍३४८९.
केला उपकार जगी तारियेले सर्व । निवृत्ति गुरु माझा जीव उध्दरिले सर्व ॥१॥
कायावाचामनें शरण निवृत्तिपायीं । देहभावें मीतूंपणा उरलाची नाही ॥२॥
ऐसा श्रीनिवृत्ति ज्ञानदेवें धरिला चित्ती । चांगया प्रेम दिधले गुरु वोळखिला चित्ती ॥३॥
एका जनार्दनी शरण निवृत्तिप्रती । संसार नुरेचि उरी निवृत्ति म्हणता चित्ती ॥४॥