703.
भजन करा रे हरिहरा | नारायण शिवशंकरा |माझे बोलणे हे अवधारा | भेद न करा दोघांचा ॥१॥
तुम्हा सांगेन सत्य वृत्तांत | पाहे पा तेथीचा दृष्टांत |नारायणे सेविले अमृत | जाला श्वेत महादेव ॥२॥
शंभूने गिळिले हलाहला | म्हणोनि विष्णू जाला निळा |देखत देख आंधळा | झणी होसी गव्हरा ॥३॥
लक्ष्मीरूपे आपण हरू | देवे वरिला शारंगधरू |गरुडरूपे महेश्वरू | वहन जाला विष्णूचे ॥४॥
शक्तिरूपे शारंगपाणि | नारायण जाला भवानी |शारंगधर नंदी होऊनि | सन्मुखासनी बैसला ॥५॥
एक तो एक वेगळा नाही | दृष्टांत तू आगमी पाही |नामा म्हणे एक केशव ध्यायी | हरिहर पाही ज्याचे अवतार ॥६॥