594.
पहाते पहाणे पहात निरुते ।
पाहिलिया तेंथे तेचि होय ॥१॥
तोची तो आपण श्रीमुखे जाण ।
आणिक साधन नलगे काही ॥२॥
भानुबिबेविण निरसले तम ।
ज्ञानदेवी वर्म सांगितले ॥३॥

अर्थ :
ज्ञानेश्वर महाराज म्हणतात त्या ब्रह्मस्वरूपाकडे पहा. तेच तुझे लक्ष्य असू दे. म्हणजे त्याच्या दर्शनाने तुही तद्रूप होशील. तो परमात्मा तूंच आहेस अशी खात्री तू करून घे. या खात्रीला दुसऱ्या साधनाची आवश्यकता नाही. याप्रमाणे माझ्या श्रीगुरू निवृत्तीरायांनी सूर्योदयावाचून माझ्या ठिकाणच्या अज्ञानरूपी अंधःकाराचा नाश केला. असे माउली ज्ञानदेव सांगतात.